20/4*సుప్రభాత కాంతులు* కందంలో *మంగళా శాసనమ్* (14 శ్లోకాలు)

********************************************************

*సుప్రభాత కందం*

*స్వేచ్ఛానువాదం*

*శ్రీ వేంకటేశ్వర మంగళాశాసనమ్*(14 శ్లోకాలు)

*శ్లోకం..57*

శ్రియః కాంతాయ కల్యాణనిధయే నిధయే‌ర్థినామ్ |

శ్రీవేంకట నివాసాయ శ్రీనివాసాయ మంగళమ్|| 

*కందం..57*

మంగళమో లక్ష్మీశా!

మంగళమో భక్తసులభ! మహనీయగుణా!

మంగళమో శ్రీ నిలయా!

మంగళమో తిరుమలేశ!మంగళమయ్యా!

 తాత్పర్యం..

 ఓ లక్ష్మీపతీ!ఓ భక్తసులభా!ఓ మహనీయగుణాకరా!ఓ శ్రీ నిలయా!ఓ తిరుమలేశా!నీకు మంగళమగుగాక!

*****************************

*శ్లోకం..58*

లక్ష్మీ సవిభ్రమాలోక సుభ్రూ విభ్రమ చక్షుషే |

చక్షుషే సర్వలోకానాం వేంకటేశాయ మంగళమ్ ||

*కందం..58*

అచ్చెరువున శ్రీదేవిని

విచ్చిన కనుదోయి మెరయ వింటిబొమలతో

ముచ్చట మీరగ గాంచెడు

పచ్చవిలుతుతండ్రి!నీకు భద్రమగు నయా!

2. తాత్పర్యం..

ఓ మన్మధజనకా!చక్కనైన కనుబొమలతో అలరారి మెరుస్తూ  విచ్చిన కన్నులతో ముచ్చటమీరగా నీ సతియైన లక్ష్మీదేవిని చూసే ఓ స్వామీ!నీకు మంగళమగుగాక.

 ****************************

*శ్లోకం..59*

శ్రీ వేంకటాద్రి శృంగాగ్ర మంగళాభరణాంఘ్రయే|

మంగళానాం నివాసాయ శ్రీనివాసాయ‍ మంగళమ్||

*కందం..59*

వేంకటవరగిరిశిఖరి,శు

భాంకితమైనట్టి దివ్యపాదయుగళితో

యంకిలి దీర్చుచు శుభమిడు

శంకరవినుతా!తమకిదె శ్వశ్రేయమయా!

తాత్పర్యం:59

 ఘనమైన వేంకటాద్రిశిఖరంపై వెలిసి,నీ దివ్య చరణదర్శనంతో భక్తుల కలతలు తొలగించి కాపాడే ఓ శ్రీనివాసా!శంకరమిత్రా! నీకు మంగళమగుగాక.

****************************

*శ్లోకం..60*

సర్వావయవ సౌందర్య సంపదా సర్వచేతసామ్| 

సదా సమ్మోహనాయాస్తు వేంకటేశాయ మంగళమ్ ||

*కందం...60*

తను‌ వణువణువున చెలువము

కనువిందులు చేయ నిలచి కమలాకాంతా!

కనుగొన వచ్చెడు భక్తుల

మనములు మురిపించు స్వామి !మంగళమయ్యా!

తాత్పర్యం: 60

అణువణువునా సౌందర్యం ఉట్టిపడే రూపంతో నిన్ను చూడవచ్చిన భక్తుల హృదయాలను మురిపించే ఓ కమలాకాంతా! నీకు మంగళమగుగాక.

****************************

*శ్లోకం..61*

నిత్యాయ నిరవద్యాయ సత్యానంద చిదాత్మనే|

సర్వాంతరాత్మనే శ్రీమద్వేంకటేశాయ మంగళమ్‌||

*కందం..61*

నిత్యుండవు నిర్మలుడవు

సత్యమ్మగు యాత్మయందు సతము రమించే

దైత్యారీ!సర్వాత్మక!

ప్రత్యహమును పల్కెద‌ మిదె భద్రము నీకున్.

తాత్పర్యం:  61

ఓ రాక్షసాంతకా!నిత్యమై,సత్యమై, నిర్మలమైన ఆత్మయందు సతతమూ రమించే ఓ సర్వాత్మకా! ప్రతినిత్యమూ నీకు మంగళమగు గాక.

****************************

*శ్లోకం..62*

స్వతస్సర్వవిదే సర్వశక్తయే సర్వశేషిణే |

సులభాయ సుశీలాయ వేంకటేశాయ మంగళమ్||

కందం...62

సర్వము నెరిగినవాడవు

సర్వగుణాఢ్యుడవు సర్వశక్తియుతుడవే

సర్వజగతి కాద్యుండవు

సర్వాత్మా! సర్వవరద! శ్వశ్రేయమయా!

తాత్పర్యం:62

ఓ సర్వాత్మకా!సర్వవరదా!నీవు సర్వగుణసంపన్నుడవు.సర్వశక్తియుతుడవు.సర్వజగతికీ ఆద్యుడవు.మూలశక్తివి.అట్టి నీకు మంగళమగుగాక.

*****************************

*శ్లోకం..63*

పరస్మైబ్రహ్మణే పూర్ణకామాయ పరమాత్మనే |

ప్రయుంజేపరతత్వాయ వేంకటేశాయ మంగళమ్||

*కందం..63*

నీవేలే పరమాత్మవు

నీవేలే బ్రహ్మమనగ నీవే స్వామీ!

నీవేలే పరతత్వము

నీవే కోర్కెల యవధివి నీకు శుభమగున్.

తాత్పర్యం:63

స్వామీ!నీవే పరమాత్మవు.పరబ్రహ్మవు.పరతత్వానివి.కోర్కెలన్నీ తీర్చి మోక్షం ఇచ్చేవాడివి.అట్టి నీకు మంగళమగుగాక.

****************************

*శ్లోకం..64*

ఆకాలతత్వ మశ్రాంత మాత్మనా మనుపశ్యతామ్|

 అతృప్త్యమృతరూపాయ వేంకటేశాయ మంగళమ్||

*కందం..64*

ఎంత తడవు చూచిన నిసు

మంతయు తనియదు కద! మది యా శుభ రూప

మ్మెంత సుధామయ మా శ్రీ

కాంతుకు జయ మంగళమని కదిసి పొగడరే!

.తాత్పర్యం:64

స్వామీ! అమృతతుల్యమైన  నీ దివ్యమంగళరూపాన్ని ఎంతసేపు చూసినా  తనివితీరదు.అట్టి శ్రీకాంతుడవైన నీకు మంగళమగుగాక.

*****************************

*శ్లోకం..65*

ప్రాయః స్వచరణౌ పుంసాం శరణ్యత్వేన పాణినా |

కృపయాదిశతే శ్రీమద్వేంకటేశాయ మంగళమ్ ||

*కందం..65*

పురుషోత్తమ! నరజాతికి

పరమదయను వరదహస్తపావనముద్రన్

తరియగ నా పాద మిదియె

శరణని జూపెడు తమకిదె శ్వశ్రేయమయా!

తాత్పర్యం:65

ఓ పురుషోత్తమా! "భక్తులారా! సంసార సాగరాన్ని దాటడానికి ఇదిగో నా పాదాలను ఆశ్రయించండి" అని మానవులకు దయతో నీ వరదహస్తపావనముద్రను పట్టి చూపే నీకు మంగళమగుగాక.

*****************************

*శ్లోకం..66*

దయామృత తరంగిణ్యా స్తరంగైరివ శీతలైః|

అపాంగై స్సించతే విశ్వం వేంకటేశాయ మంగళం ||

*కందం..66*

కరుణామృతఝరి కన్నుల

కురిపించుచు జగము లేలు కొండలరాయా!

శరణిడి చల్లగ గాచెడు

వరదా!ఓ శ్రీనివాస!భద్రము నీకున్.

తాత్పర్యం:66

ఓ ఏడుకొండల వాడా!కరుణామృతవాహినిని కన్నులలో కురిపించి వరదుడవై లోకాలకు శరణమిచ్చి చల్లగా కాపాడే ఓ శ్రీనివాసా! నీకు మంగళమగుగాక.

 

*****************************

*శ్లోకం..67*

స్రగ్భూషాంబర హేతీనాం సుషమా‌వహమూర్తయే |

సర్వార్తి శమనాయాస్తు వేంకటేశాయ మంగళమ్ ||

*కందం..67*

విరిమాలలు వరచేలము

ధరియించియు భూషణములు,దరహాస రుచిన్

హరియింతువుగా పాపము

సిరినాథా!భద్రమనుచు చేరి భజింతున్.

తాత్పర్యం:67

ఓ శ్రీనాథా!పూమాలలు,ఆభరణములు,పట్టుపీతాంబరము ధరించి నీ దరహాస కాంతులతో మా పాపములను హరించే ఓ స్వామీ!నీకు

  మంగళమగుగాక.

***************************

శ్లోకం..68

శ్రీ వైకుంఠ విరక్తాయ స్వామి పుష్కరిణీతటే|

రమయా రమమాణాయ వేంకటేశాయ మంగళమ్ ||

కందం..68

అల వైకుంఠ పురిని విడి

చెలి శ్రీ మహలక్ష్మి గూడి స్థిరముగ నీవీ

యిల తిరుపుష్కరిణీతటి

వెలసిన తిరునాథ !శుభము వేకువ వేళన్.

తాత్పర్యం:68

ఓ తిరుమలేశా! వైకుంఠమునకు వీడి, శ్రీమహాలక్ష్మితో కూడి కలియుగవైకుంఠమైన ఈ తిరుమలలోని పుష్కరిణీతీరంలో వెలసిన నీకు మంగళమగుగాక.

****************************

శ్లోకం..69

శ్రీమత్సుందర జామాతృముని మానసవాసినే |

సర్వలోక నివాసాయ శ్రీనివాసాయ మంగళమ్ ||

కందం...69

జామాతృ మునీంద్రు మదిని

స్వామీ!నిలిచితివి సతము సదయుడవగుచున్

భూమాతకు,లోకములకు

క్షేమమొసగి యేలువాడ! సేమము నీకున్.

తాత్పర్యం.. 69

ఓ శ్రీనివాసా!జామాతృ మునీంద్రుని మదిలో కొలువై, నిత్యమూ భూమాతకు,సకల లోకములకు క్షేమము కలుగునట్లు పాలించే నీకు మంగళమగుగాక.

**************************

శ్లోకం..70

మంగళా శాసనపరైర్మదాచార్య పురోగమైః |

సర్వైశ్చ పూర్వైరాచార్యైః సత్కృతాయాస్తు మంగళమ్ ||

కందం..70

సేవించెడు యాచార్యులు

కావించెడు స్తోత్రములను కడు రమ్యముగా

భావనలో గొని జగముల

దీవించెడు నీకు శుభము తిరుమలవాసా!

తాత్పర్యం:70

ఓ తిరుమలవాసా! సుప్రభాత స్తోత్రపాఠాలను కమనీయంగా ఆలపిస్తూ, నిన్ను కొలిచే ఆచార్యుల  సేవలను సంతోషంతో స్వీకరించి దీవెన లొసగే ఓ స్వామీ! నీకు మంగళమగుగాక.

***************************

ముగింపు కందాలు

కందం..70A

 మంగళమన బ్రహ్మాదులు

మంగళమన విబుధులు తిరుమల గిరినిలయా!

మంగళమన మునిగణములు

మంగళమన భక్తకోటి మహి నేలుమయా!

తాత్పర్యం:70B

ఓ తిరుమల వాసా!బ్రహ్మాది దేవతలు,మునిగణములు,భక్తజనుల మంగళస్తోత్రములను అందుకుంటూ లోకాలను చల్లగా పరిపాలించే శ్రీనివాసా! నీకు మంగళమగుగాక.

కందం..70B

మంగళమో మత్స్యాకృత

మంగళమో కమఠ కోల మరియు నృసింహా!

మంగళమో చిన్ని వడుగ!

మంగళమో పరశురామ! మంగళమయ్యా!

తాత్పర్యం:70 B

మత్స్య,కూర్మ,వరాహ, నారసింహ,వామన,పరశురామాది అవతారములను ధరించి లోకాలనేలిన ఓ శ్రీహరీ! నీకు మంగళమగుగాక.

కందం..70 C

మంగళమో దాశరథీ!

మంగళమో రౌహిణేయ! మాధవదేవా!

మంగళమగు కల్కికికను

మంగళమో వేంకటేశ! మంగళమయ్యా!

తాత్పర్యం:70 C

శ్రీరామ,బలరామ, శ్రీకృష్ణ అవతారములు ధరించి, భవిష్యత్తులో కల్కి అవతారము ధరింపబోయే ఓవేంకటేశా! నీకు మంగళమగుగాక.

***************************

శ్రీ వేంకటేశ్వర సుప్రభాతం, స్తోత్రం, ప్రపత్తి, మంగళా శాసనాలు సంపూర్ణం.

మొత్తం శ్లోకాలు..70

మొత్తం కందం.. 78

సింహాద్రి జ్యోతిర్మయి 

కవయిత్రి

నవ్యాంధ్ర రాష్ట్ర రచయిత్రుల సంఘం

(న ర సం) రాష్ట్ర ఉపాధ్యక్షురాలు

https://drive.google.com/file/d/1yw6DmB0QqX_vxUjGRykHYXMnGP4bN0PO/view?usp=drivesdk

సుప్రభాత కందం PDF 

****************************

****************************