20/2 స్తోత్రం

**********************************************************

   శ్రీ వేంకటేశ స్తోత్రం 

శ్లోకం..30

కమలాకుచ చూచుక కుంకమతో

నియతారుణితాతులనీలతనో ।

కమలాయతలోచన లోకపతే

విజయీభవ వేంకట శైలపతే ॥

కందం -30

కలుములసతి తన తనువున

నలదిన కుంకుమ పరాగ మంటిన యెదతో

విలసిల్లెడు నల్లనయా!

కలుగునుగా నీకు జయము గరుడాద్రి విభో!

తాత్పర్యం : 

ఓ గరుడాద్రివాసా! శ్రీలక్ష్మీదేవి తన తనువుపై అలదుకొన్న

  కుంకుమపరాగము అంటుకున్న వక్షస్థలంతో విలసిల్లే ఓ నీలమేఘశ్యామా!నీకు జయమగుగాక.

🍂🍂🍂🍂🍂🍂🍂🍂🍂🍂🍂

*శ్లోకం..31*

సచతుర్ముఖ షణ్ముఖ పంచముఖ

ప్రముఖాఖిలదైవతమౌళిమణే|

శరణాగతవత్సల సారనిధే

పరిపాలయమాం వృషశైలపతే||

కందం..31

చాలరుగా నీ కీర్తికి

ఫాలాక్షుం డతని సుతుడు,పరమేష్ఠ్యాదుల్

వ్రాలిన నీ వత్సలతను

పాలింపుము జగము లెల్ల పన్నగశయనా!

తాత్పర్యం : 

ఓ పన్నగశయనా! ఆ త్రినేత్రుడు, కుమారస్వామి,విధాత కూడా నీ కీర్తికి సములు కారు.అట్టి ఘనదైవమైన నీవు అతిశయించిన నీ దయతో లోకాలను పాలింపుము.

🍂🍂🍂🍂🍂🍂🍂🍂🍂🍂🍂

శ్లోకం - 32

అతివేలతయా తవ దుర్విషహై

రను వేలకృతై రపరాధశతైః !

భరితం త్వరితం వృష శైలపతే

పరయా కృపయా పరిపాహి హరే !!

*కందం - 32*

దోసమనక నియతిని విడి

చేసితి నపరాధశతము శ్రీశా! దయతో

దాసుని మన్నించి మదిని

వేసట తొలగించి యేలు వృషశైలపతీ!

తాత్పర్యం : 3. 

ఓ వృషశైలపతీ! నీతినియమాలు పాటించక శతాధికముగా చేసిన నా అపరాధములను మన్నించుము.  మిక్కిలి దయతో నా మదిలోని వేదన తొలగించి నన్ను  కాపాడుము.

🍂🍂🍂🍂🍂🍂🍂🍂🍂🍂🍂

*శ్లోకం..33*

అధివేంకటశైల ముదారమతే

ర్జనతాభిమతాధికదానరతాత్

పరదేవతయా గదితాన్నిగమైః

కమలాదయితాన్న పరం కలయే

*కందం..33*

పరదేవతవగు వేంకట

గిరివాసా!భక్తజనుల కృపగను స్వామీ!

సిరిదేవికి ప్రాణవిభూ!

పరదైవము గొల్వ, నీదు పదములు విడువన్.

తాత్పర్యం :  ఓ వేంకటేశ్వరా!నీవే పరదేవతవు.భక్తజనులను దయతో కాపాడే స్వామివి.శ్రీమహాలక్ష్మికి ప్రాణనాథుడవు.నేను వేరే దైవమును కొలువలేను.నీ పాదపద్మములను విడువను.

🍂🍂🍂🍂🍂🍂🍂🍂🍂🍂🍂

*శ్లోకం..34*

కలవేణు రవా వశ గోపవధూ

శతకోటి వృతా త్స్మరకోటి సమాత్‌|

ప్రతిపల్ల వికాభిమతా త్సుఖదాత్‌

వసుదేవసుతాన్న పరం కలయే||

*కందం..34*

పరవశమున వ్రజకాంతలు

మురళీముఖరరవమునకు మోహన లగుచున్

స్మరసమ రూపుడవగు నీ

దరిజేరెడు యా నిజపదదాసుడనగుదున్

తాత్పర్యం : .

ఓ గోవిందా! మనోహరమగు  మరళీరవమునకు పరవశలై గోపకాంతలు మన్మథాకారుడ వైన నీదరి చేరుచున్నారు.అట్టి నీ పాదపద్మములకు నేనును దాసుడనగుచున్నాను.

🍂🍂🍂🍂🍂🍂🍂🍂🍂🍂🍂

*శ్లోకం..35*

అభిరామ గుణాకర దాశరథే

జగదేక ధనుర్ధర ధీరమతే|

రఘునాయక రామ రమేశ విభో

వరదోభవ దేవ దయాజలధే||

*కందం..35*

రామా!దశరథ నందన

రామా! సుగుణాలవాల! రఘువంశవిభూ!

రామా!సీతారమణా!

రామా!కోదండపాణి!రక్షింపుమయా!

తాత్పర్యం : 

ఓ శ్రీ రామా!ఓ దశరథనందనా!ఓ సుగుణాభిరామా!ఓ రఘువంశతిలకా! ఓ సీతారమణా!ఓ కోదండపాణీ!నన్ను రక్షించుము.

🍂🍂🍂🍂🍂🍂🍂🍂🍂🍂🍂

*శ్లోకం..36*

అవనీ తనయా కమనీయ కరం

రజనీకర చారు ముఖాంబురుహమ్ |

రజనీచర రాజ తమోమిహిరం

మహనీయ మహం రఘురామమయే||

*కందం..36*

వదనము చందురు చందము

కదనములో రావణునకు కాలుడవేగా

సుదతీమణి వైదేహికి

మది కోర్కెలు తీర్చు స్వామి మము బ్రోవుమయా!

తాత్పర్యం : 36

ఓ శ్రీరామా!  చంద్రునికాంతులు వెదజల్లే మోమునీది.యుద్ధరంగలో రావణునికి సాక్షాత్తూ  యమధర్మరాజువే.ఆ సీతాదేవి కోరిన కోర్కెలు తీర్చే ఓ స్వామీ! మమ్ములను రక్షించు.

🍂🍂🍂🍂🍂🍂🍂🍂🍂🍂

*శ్లోకం..37*

సుముఖం సుహృదం సులభం సుఖదం

స్వనుజం చ సుకాయమ మోఘశరమ్|

అపహాయ రఘూద్వహ మన్యమహం

న కథంచన కంచన జాతుభజే||

కందం.37

మోమున, తనువున,మనసున

రామా!యొక చక్కదనము రాజిలు స్వామీ!

ఏమా!బాణంపు గురియు

ప్రేమాస్పదులగు యనుజుల ప్రియ సోదరుడా!

తాత్పర్యం: 37

 ముఖమునందు,తనువునందు, మనసునందు ఒక చక్కదనము తొణికిసలాడే ఓ శ్రీరామా!. నీ బాణం తిరుగులేనిది.నీ సోదరప్రేమ ఎంతో ఘనమైనది.

🍂🍂🍂🍂🍂🍂🍂🍂🍂🍂🍂

*శ్లోకం.. 38*

వినా వేంకటేశం న నాథో న నాథః

సదా వేంకటేశం స్మరామి స్మరామి|

హరే వేంకటేశ ప్రసీద ప్రసీద

ప్రియం వేంకటేశ ప్రయచ్ఛ ప్రయచ్ఛ||

*కందం..38*

నిత్యము నిను సేవింతును

సత్యము, నే కొలువబోను స్వామీ! పరులన్

భృత్యుడ నను పాలింపుము

ప్రత్యూషపువేళ సలుపు ప్రార్థన గొనుమా!

తాత్పర్యం: 38

స్వామీ!నేను నిత్యమూ నిన్నే సేవిస్తాను.వేరే ఏ దైవమునూ కొలువను.ఈ ఉదయవేళ నేను చేసే ఈ ప్రార్థన విని,నీ సేవకుడనైన నన్ను కరుణించి ఏలుకో.

🍂🍂🍂🍂🍂🍂🍂🍂🍂🍂🍂

*శ్లోకం..39*

అహందూరతస్తే పదాంభోజయుగ్మ

ప్రణామేచ్చయాగత్య సేవాం కరోమి|

సకృత్సేవయా నిత్యసేవా ఫలం త్వం

ప్రయచ్చ ప్రయచ్చ ప్రభో వెంకటేశ ||

*కందం..39*  

అడిగెద నిన్నొక్క వరము

కడు పావన పాదయుగళి కైంకర్యము,నే

నెడబాయక చేసిన ఫల

మిడుమా!చేరంగజాల నిట కనుదినమున్. 

తాత్పర్యం : 39

ఓ వేంకటేశ్వరా!నేను నిత్యమూ నీ కొండకు రాలేను. 

 నీ పాదపద్మములను ఒక్దకసారి ధర్శించి చేసిన ఈ సేవకే ప్రతిదినమూ నిన్ను దర్శించిన ఫలము కలుగునట్లుగా వరము నిచ్చి నన్ను అనుగ్రహించుము. 

🍂🍂🍂🍂🍂🍂🍂🍂🍂🍂🍂

*శ్లోకం..40*

అజ్ఞానినా మయా దోషా

 న శేషాన్విహితాన్ హరే |

క్షమస్వ త్వం క్షమస్వ త్వం 

శేషశైల శిఖామణే ॥

కందం..40

శేషాచలవాసా! కడు

దూషితచరితుని,దురాత్ము, తుంటరి ననుచున్

రోషింపకు యజ్ఞానిని

దోషము లన్నియు క్షమించి దొసగు లుడుపుమా!

తాత్పర్యం : 

ఓ శేషాచలవాసా! మూఢుడనని అనేకములైన నేరములను చేశానని, తుంటరినని నాపై కోపగించకు. ఓ శ్రీహరీ!. వాని నన్నిటినీ క్షమించి నా  ఆపదలను తొలగించి నన్ను కాపాడుము.

🍂🍂🍂🍂🍂🍂🍂🍂🍂🍂🍂

కందం..

స్తోత్రము జేసితి నిన్నిదె

పాత్రత లేదనక నాదు పద్యనివాళిన్

గోత్రము నెత్తిన నందుని

పుత్రా!నా జన్మ తరియ ముదమున గొనుమా!

తాత్పర్యం..

ఓ నందగోపాలా! గోవర్ధనగిరిధారీ! కందపద్యాలలో నేను నిన్ను ప్రస్తుతిస్తున్నాను.నాకు అర్హత లేదు అని అనకుండా సంతుష్ట హృదయుడవై నా పద్యహారతిని స్వీకరిస్తే చాలు.నా జన్మ తరించిపోతుంది.

🍂🍂🍂🍂🍂🍂🍂🍂🍂🍂🍂🍂🍂🍂🍂🍂🍂🍂🍂🍂🍂🍂