గీతా కంద మరందం -2 (సంపూర్ణం)

➖➖➖➖➖➖➖➖

గీతా (కంద) మరందం

➖➖➖➖➖➖➖➖

➖➖➖➖➖➖➖➖

2.సాంఖ్య యోగం 

➖➖➖➖➖➖➖➖

శ్లోకం 1

సంజయ ఉవాచ:-

తం తథా కృపయా 22విష్టమ్

అశ్రుపూర్ణాకులేక్షణమ్

విషీదన్త మిదం వాక్యమ్ 

ఉవాచ మధుసూదనః ||

సంజయ ఉవాచ:-

సంజయుడు చెప్పెను 

టీక:-

తథా=‌అట్లు;

 కృపయా=కనికరముచేత

 ఆవిష్టమ్=కూడుకొనియున్న వాడును

 అశ్రుపూర్ణాకులేక్షణమ్=కన్నీటితో నిండిన వ్యాకులమైన నేత్రములు గలవాడును

 విషీదన్తమ్= దుఃఖించుచున్నవాడును అగు

తం =ఆ అర్జునుని గూర్చి 

మధుసూదనః=శ్రీకృష్ణమూర్తి 

ఇదం వాక్యం=ఈ (చెప్పబోవు) వాక్యమును

 ఉవాచ=పలికెను.

తాత్పర్యం:-

సంజయుడు చెప్పెను.

ఆ ప్రకారంగా కనికరముతో కూడుకొని,కంటనీరు పెట్టుకొంటూ,కలవరపాటుతో దుఃఖిస్తున్న ఆ అర్జునుని చూసి శ్రీకృష్ణుడు ఇలా పలికినాడు.

నా అనువాద పద్యం:-

కం.

ఈ రీతిని కలవరమున

జారెడు కన్నీటి కనుల జాలిని గొనుచున్ 

తేరున దుఃఖించు నరుని 

తీరుని గని మాధవుండు తెలియగ  బలికెన్. (2-1)

🙏🙏🙏🙏🙏🙏🙏🙏🙏🙏🙏

శ్లోకం - 2

శ్రీ భగవానువాచ:-

కుతస్త్వా కశ్మలమిదం

విషమే సముపస్థితమ్ |

అనార్యజుష్ట మస్వర్గ్యం

అకీర్తికర మర్జున || (2-2)

టీక:-

అర్జున= ఓ అర్జునా 

అనార్యజుష్టం= పామరులచే నవలంబింపబడదగినదియు

అస్వర్గ్యం =స్వర్గప్రాప్తికి భంగకరమైనదియు 

అకీర్తికరం =అపకీర్తిని కలిగించునదియు అగు 

ఇదం= ఈ

కశ్మలం =మనోవ్యాకులత్వము (మోహము)

విషమే= ఈ విషమసమయమందు 

త్వా= నిన్ను 

కుతః =ఎక్కడినుండి ( లేక ఏ కారణము చేత)

సముపస్థితం =పొందినది?

తాత్పర్యం:-

శ్రీ భగవానుడు చెప్పెను 

ఓ అర్జునా!పామరులు అవలంబించునదియు,స్వర్గ ప్రతిబంధకమును, అపకీర్తిని కలిగించునదియు అగు ఈ మోహము ఈ విషమ సమయమందు నీకెక్కడినుండి దాపురించినది?

అనువాద పద్యం :-

కం.

ఎక్కడిదీ మోహమిటుల ?

చిక్కితివో పార్థ ! రిపుల చెండెడు వేళన్ 

దక్కదు స్వర్గము కీర్తియు 

ప్రక్కకు మరలుట తగదిది పామరు పగిదిన్.(2-2)

🙏🙏🙏🙏🙏🙏🙏🙏🙏🙏🙏

శ్లోకం 3

క్లైబ్యం మాస్మగమః పార్థ

నైతత్త్వయ్యుపపద్యతే|

క్షుద్రం హృదయ దౌర్బల్యం

త్యక్త్వోత్తిష్ఠ పరన్తప||

టీక :-

పార్థ =ఓ అర్జునా 

క్లైబ్యం= అధైర్యమును 

మాస్మగమః= పొందకుము 

ఏతత్= ఇది 

త్వయి= నీయందు 

న ఉపపద్యతే= తగదు 

పరన్తపః =శత్రువులను తపింపజేయు ఓ అర్జునా !

క్షుద్రం= నీచమైన 

హృదయ దౌర్బల్యం= మనోదుర్బలత్వమును 

త్యక్త్వా= విడిచి 

ఉత్తిష్ఠ= (యుద్ధమునకు) లెమ్ము 

తాత్పర్యం:-

ఓ అర్జునా! అధైర్యమును పొందకుము.ఇది నీకు తగదు.నీచమగు ఈ మనోదుర్బలత్వమును వీడి యుద్ధము చేయుటకు లెమ్ము.

అనువాద పద్యం:-

కం.

పొందకు మధైర్య మది నీ

కందువకున్ తగదు పార్థ!కడు హేయమగున్ 

కొందలమును విడి లెమ్మా!

యందగ విజయమ్ము పట్టు మాయుధ మింకన్. (2-3)

కందువ.. సామర్థ్యం 

కొందలము.. క్షోభ 

🙏🙏🙏🙏🙏🙏🙏🙏🙏🙏🙏

శ్లోకం 4.

అర్జున ఉవాచ 

కథం భీష్మమహం సంఖ్యే 

ద్రోణం చ మధుసూదన |

ఇషుభిః ప్రతియోత్స్యామి 

పూజార్హావరిసూదన || (2-4)

ప్రతిపదార్థం :-

అర్జున ఉవాచ =అర్జునుడు అడిగెను

అరిసూదన= శత్రువులను నశింపజేయునట్టి 

మధుసూదన= ఓ శ్రీకృష్ణా!

పూజార్హౌ= పూజింపదగినట్టి 

భీష్మం =భీష్ముని 

ద్రోణం చ =ద్రోణుని

సంఖ్యే= యుద్ధమునందు 

అహం= నేను 

ఇషుభిః =బాణములతో 

కథం =ఎట్లు 

ప్రతియోత్స్యామి= ఎదిరించి యుద్ధం చేయగలను?

తాత్పర్యం :-

అర్జునుడు అడిగెను -ఓ కృష్ణా! భీష్మ ద్రోణులిరువురును పూజింపదగినవారు.అట్టివారిపై బాణములను వదలి నేనెట్లు యుద్ధము చేయగలను?

అనువాద పద్యం ;-

కం.

మధుసూదన! గాంగేయుని

విధిగా పూజింపదగిన విద్యాగురులన్ 

వ్యధ చెందక బాణమ్ముల 

వధియింపగ నోపుటెట్లు?బంధుల హితులన్. (2-4)

🙏🙏🙏🙏🙏🙏🙏🙏🙏🙏🙏

శ్లోకం 5

గురూనహత్వా హి మహానుభావాన్ 

శ్రేయో భోక్తుం భైక్ష్యమహీహ లోకే

హత్వార్థకామాంస్తు గురూనిహైవ 

భుంజీయ భోగాన్ రుధిరప్రదిగ్ధాన్ 

ప్రతిపదార్థం:-

మహానుభావాన్= మహానుభావులైన 

గురూన్= గురువులను 

అహత్వా =చంపక 

ఇహలోకే =ఈ లోకమునందు

భైక్ష్యమపి= భిక్షాన్నమైనను

భోక్తుం= భుజించుటకు 

శ్రేయోహి= మంచిది కదా 

గురూన్ =గురువులను 

హత్వాతు= చంపియో 

ఇహైవ= ఈ లోకముననే 

రుధిరప్రదిగ్ధాన్= రక్తముచే పూయబడిన 

అర్థకామాన్ =సంపదలు,కామ్య వస్తువుల రూపమగు 

భోగాన్ =భోగములను 

భుంజీయ= భుజించువాడ నగుదును .

తాత్పర్యం:-

మహానుభావులైన గురువులను చంపక,ఈ లోకమునందు భిక్షాన్నమైనను భుజించుట మంచిది.వారిని చంపినచో అత్తఱి వారి రక్తముతో తడిసిన ధనసంపదలనే అనుభవింపవలసియుండును.

అనువాద పద్యం :-

కం.

మహనీయుల గురుల దునిమి 

యిహలోకమునందు భోగ మియ్యకొనుచు నా

నిహతుల నెత్తుటి కూటిని 

సహియింపను బిచ్చమెత్త సైతును కృష్ణా!

🙏🙏🙏🙏🙏🙏🙏🙏🙏🙏🙏

శ్లోకం - 6

న చైతద్విద్మః కతరన్నో గరీయో

యద్వా జయేమ యది వా నో జయేయుః 

యానేవ హత్వా న జిజీవిషామః

తే 2వస్థితాః ప్రముఖే ధార్తరాష్ట్రాః (2-6)

ప్రతిపదార్థం :-

నః= మనకు 

కతరత్ =ఏది 

గరీయః= శ్రేష్టమో 

ఏతత్ చ= దీనిని కూడా 

న విద్మః =ఎఱుగము 

జయేమ యద్వా= (మనము) జయించెదమో ( లేక)

నః =మనలను 

జయేయుః యదివా= (వారే) జయించెదరో

యాన్ =ఎవరిని 

హత్వా =చంపి 

న జిజీవిషామః = జీవింపగోరెదమో 

తే ధార్తరాష్ట్రాః ఏవ =అట్టి ధృతరాష్ట్రుని సంబంధులగు భీష్మాదులే 

ప్రముఖే =ఎదుట 

అవస్థితాః =నిలిచియున్నారు 

తాత్పర్యం :-

పైగా ఈ యుద్ధమున మనము గెల్తుమో లేక వారే గెలుతురో చెప్పలేము.ఈ రెండింటిలో మనకేది శ్రేష్టమో కూడా తెలియదు.ఎవరిని చంపి మనము జీవించగోరెదమో అట్టి భీష్మాదులు యుద్ధమున మన ఎదుట నిలిచియున్నారు.

అనువాద పద్యం :-

కం.6

ఎఱుగము జయాపజయముల 

నెఱుగము మనకేది విహిత మీ తరుణములోఁ

నుఱుకుచు నని సేయుటెటుల?

యెఱిగిన సంబంధులాయె నెదిరి బలమునన్.

బలము..సైన్యము

🙏🙏🙏🙏🙏🙏🙏🙏🙏🙏🙏

శ్లోకం - 7

కార్పణ్యదోషోపహతస్వభావః

పృచ్ఛామి త్వాం ధర్మసమ్మూఢచేతాః 

యచ్ఛ్రేయస్స్యాన్నిశ్చితం బ్రూహి తన్మే

శిష్యస్తే2హం శాధి మాం త్వాం ప్రపన్నమ్ 

ప్రతిపదార్థం :-

కార్పణ్యదోషోపహతస్వభావః= కృపణత్వమను దోషముచే కొట్టబడిన స్వభావము గల (నేను )

ధర్మసమ్మూఢచేతాః= ధర్మవిషయమున సందేహముగల మనస్సుగలవాడనై 

త్వాం =నిన్ను 

పృచ్ఛామి =అడుగుచున్నాను 

యత్= ‌ఏది

నిశ్చితం =నిశ్చయింపబడిన 

శ్రేయః =శ్రేయము 

స్యాత్ =అగునో 

తత్ =దానిని 

మే= నాకు 

బ్రూహి =చెప్పుము 

అహమ్ =నేను 

తే =నీకు 

శిష్యః =శిష్యుడను.

త్వాం =నిన్ను 

ప్రపన్నమ్= శరణుబొందిన 

మాం =నన్ను 

శాధి =శాసింపుమ.

తాత్పర్యం :-

(ఓ కృష్ణా!)కృపణత్వము అను దోషముచే కొట్టబడిన వాడనగుటచే ధర్మవిషయమున సందేహము గలిగి మిమ్మడుగుచున్నాను.ఏది నిశ్చయముగ శ్రేయస్కరమో దానిని చెప్పుము.నేను మీకు శిష్యుడను.శరణుపొందిన నన్ను (ఈ ప్రకారముగా నడువుము) అని శాసింపుము.

అనువాద పద్యం :-

కం.-7

ఎయ్యది నాకగు శ్రేయ

మ్మయ్యది నే నెఱుగకునికి యడుగుచునుంటిన్ 

చయ్యన చేకొని శిష్యుగ 

నెయ్యమునను యానతిమ్ము నెగులు తొలగగాన్.

నెగులు..బాధ, దుఃఖ రూపమైన విచారము 

🙏🙏🙏🙏🙏🙏🙏🙏🙏🙏🙏

శ్లోకం -8

న హి ప్రపశ్యామి మమాపనుద్యాత్

యచ్ఛోక ముచ్ఛోషణ మిన్ద్రియాణామ్ 

అవాప్య భూమావసపత్న మృద్ధం 

రాజ్యం సురాణామపి చాధిపత్యమ్ 

ప్రతిపదార్ధం :-

భూమౌ =భూమండలమునందు 

అసపత్నం= శత్రువులు లేనట్టిదియు 

ఋద్ధమ్ =సమృద్ధమైనట్టిదియు అగు

రాజ్యమ్ =రాజ్యమును (మఱియు)

సురాణామ్= దేవతల యొక్క 

ఆధిపత్యం చ =ఆధిపత్యమున్ను 

అవాప్య అపి =పొందియు కూడా 

ఇంద్రియాణామ్ =ఇంద్రియములకు 

ఉచ్ఛోషణమ్= మిక్కిలి తాపమును కలుగజేయునట్టి 

మమ= నా యొక్క 

శోకం= దుఃఖమును

యత్ =ఏది 

అపనుద్యాత్= పోగొట్టునో 

(తత్ =దానిని )

నప్రపశ్యామి హి= కనుగొనజాలకున్నాను గదా!

తాత్పర్యం:-

ఈ భూమండలమున శత్రువులు లేని సమృద్ధమైన రాజ్యమును,(స్వర్గమున) దేవతలపై ఆధిపత్యమును పొందియు కూడా, ఇంద్రియములను శోషింపజేయుచున్న ఈ నా దుఃఖమును ఏది పోగొట్టగలదో దానిని కనుగొనజాలకున్నాను.

అనువాద పద్యం :-

కం.8

దాయరహిత రాజ్యసుఖము 

దేయపు సురలోక పదవి దీనశరణ్యా!

హాయినొసగ లేవనునటు

పాయని నా దుఃఖమునకు వారణ మెఱుగన్

*దేయము ..ఇయ్యదగినది

*వారణము..అడ్డుకట్ట 

🙏🙏🙏🙏🙏🙏🙏🙏🙏🙏

శ్లోకం - 9

సంజయ ఉవాచ:-

ఏవముక్త్వా హృషీకేశం 

గుడాకేశః పరన్తపః 

న యోత్స్య ఇతి గోవిందమ్ 

ఉక్త్వా తూష్ణీం బభూవ హ

ప్రతిపదార్థం :-

సంజయ ఉవాచ =సంజయుడు చెప్పెను 

పరన్తపః= శత్రువులను తపింపజేయునట్టి 

గుడాకేశః =అర్జునుడు 

హృషీకేశమ్= శ్రీకృష్ణునితో 

ఏవం= ఈ ప్రకారముగా 

ఉక్త్వా =చెప్పి 

నయోత్స్యే= యుద్ధము చేయను 

ఇతి =అని 

గోవిన్దమ్= ఆ కృష్ణపరమాత్మ తో 

ఉక్త్వా =పలికి 

తూష్ణీం బభూవ హ =ఊరకుండెను

తాత్పర్యం:-

సంజయుడు చెప్పెను.ఈ విధముగా అర్జునుడు శ్రీకృష్ణునితో చెప్పి నేను యుద్ధము చేయను అని ఊరకుండెను.

అనువాద పద్యం :-

కం.9

ఈవిధి యా పార్థుడపుడు 

గోవిందుని తోడ పలికి కుమిలెడు మదితో 

దేవా!ఆలము సేయను 

నావల గాదంచు నిలిచె నైరాశ్యమునన్ 

🙏🙏🙏🙏🙏🙏🙏🙏🙏🙏🙏

శ్లోకం 10.

తమువాచ హృషీకేశః

ప్రహసన్నివ భారత 

సేనయోరుభయోర్మధ్యే

విషీదన్తమిదం వచః 

ప్రతిపదార్థం ;-

భారత= ఓ ధృతరాష్ట్ర మహారాజా 

ఉభయోః సేనయోః =రెండు సేనల యొక్క 

మధ్యే =నడుమ 

విషీదన్తమ్= దుఃఖించుచున్న 

తం =ఆ అర్జునుని గూర్చి

హృషీకేశమ్ =శ్రీకృష్ణుడు 

ప్రహసన్నివ= నవ్వుచున్నవానివలె 

ఇదం వచః =ఈ (చెప్పబోవు) వాక్యమును

ఉవాచ= పలికెను .

తాత్పర్యం :-

ఓ ధృతరాష్ట్ర మహారాజా! రెండు సేనల మధ్య విలపించుచున్న ఆ అర్జునుని జూచి శ్రీకృష్ణుడు నవ్వుచున్నవానివలె ఈ క్రింది వాక్యములను పలికెను.

అనువాద పద్యం :-

కం.10.

పరిపరి ఈరీతి పలికి 

మరిమరి దుఃఖించు నరుని మాధవదేవుం

డరవాయిని మాన్పదలచి 

చిరునవ్వున నాంబికేయ! చెప్పమొదలిడెన్.

*అరవాయి...సంకోచం,అధైర్యం

🙏🙏🙏🙏🙏🙏🙏🙏🙏🙏🙏

శ్లోకం 11

శ్రీ భగవానువాచ:-

అశోచ్యానన్వశోచస్త్వం ప్రజ్ఞావాదాంశ్చ భాషసే|

గతాసూనగతాసూంశ్చ నానుశోచన్తి పణ్డితాః||2-11||

ప్రతిపదార్థం :-

శ్రీ భగవానువాచ=భగవానుడు చెప్పెను 

త్వమ్ =నీవు;అశోచ్యాన్= శోకింపదగని వారిని గూర్చి ;అన్వశోచః =శోకించితివి;ప్రజ్ఞావాదామ్ చ= బుద్ధివాదముతో గూడిన మాటలను గూడ ;భాషసే =పలుకు చున్నావు ;పండితాః =ఆత్మ జ్ఞానము కలవారు;గతాసూన్ =మరణించిన వారి గురించియు ;

;అగతాసూన్ =బ్రతికి ఉన్న వారిని గురించియు;

;న అనుశోచంతి = దుఃఖింపరు.

తాత్పర్యం :-

(అర్జునా!) నీవు శోకింప దగనివారిని గూర్చి శోకించితివి. పైగా బుద్ధి వాదముతో గూడిన వాక్యములను గూడ పలుకు చున్నావు. జ్ఞానులగువారు మరణించినవారిని గురించి గానీ జీవించియున్న వారిని గురించి గానీ యెన్నటికినీ దుఃఖింపరు.

అనువాద పద్యం :-

కందం-11

శోకించెదు ప్రజ్ఞ లిటుల 

శోకింపగ దగనివారి జూచి పలుకుచున్ 

లోకమునన్ ప్రాజ్ఞులెపుడు 

శోకింపరు జననమరణ సొరిదిని గనుచున్ (2-11)

సొరిది...వరుస,క్రమము

🙏🙏🙏🙏🙏🙏🙏🙏🙏🙏🙏

శ్లోకం - 12

న త్వేవాహం జాతు నాసం 

న త్వం నేమే జనాధిపాః

న చైవ న భవిష్యామః 

సర్వే వయమతః పరమ్ 

ప్రతిపదార్థం :-

అహమ్ =నేను 

జాతు =ఒకప్పుడును 

నాసం (ఇతి)= ‌లేననునది

నతుఏవ= లేనేలేదు 

త్వమ్= నీవు 

(న ఆసీః ఇతి) న= లేవనునది లేదు 

ఇమే =ఈ 

జనాధిపాః =రాజులు 

(న ఆసన్ ఇతి) న= లేరనునది లేదు 

అతః పరమ్ =ఇకమీదట

వయంసర్వే= మనముమందఱమును

న భవిష్యామః ( ఇతి) చ= లేకపోవుదు మనునదియు

న ఏవ =లేదు 

తాత్పర్యం :-

అర్జునా!నేను గానీ,నీవు గానీ,ఈ రాజులు గానీ  ఒకప్పుడును లేనివారముకాదు.ముందున్ను లేకపోవువారము కాము.

అనువాద పద్యం :-

కం.12.

నీవును నేనును పార్థా!

రావడి గనలేని శత్రురాజ నివహముల్ 

చావునెఱుంగము పూర్వము

భావిని లేకుండపోము భద్రాత్ములమై

*రావడి..ఉపద్రవం,ఆపద, ముప్పు 

🙏🙏🙏🙏🙏🙏🙏🙏🙏🙏🙏

సాంఖ్య యోగం 

 శ్లో|| 13

దేహినోऽస్మిన్ యథా దేహే 

కౌమారం యౌవనం జరా|

తథా దేహాన్తరప్రాప్తిః

ధీర‌ స్తత్ర న ముహ్యతి ||2-13||

ప్రతిపదార్థం:-

దేహినః = జీవునకు;అస్మిన్ దేహే= ఈ శరీరమునందు;కౌమారమ్= బాల్యము;యౌవనమ్= యౌవనము ;జరా = వార్ధక్యము ;యథా =ఎట్లో ;తథా =అట్లే ;దేహాన్తర ప్రాప్తిః= మరియొక దేహమును పొందుటయు (కలుగుచున్నది);తత్ర =ఈ విషయమున ;ధీరః =జ్ఞాని ;న ముహ్యతి = మోహమునొందడు .

తాత్పర్యం:- 

జీవునకు ఈ దేహమునందు బాల్యము, యౌవనము, ముసలితనము అను అవస్థలు ఎట్లు కలుగుచున్నవో మరొక దేహమును పొందుటకు కూడ అట్లే తటస్థించుచున్నది. కనుక ఈ విషయమున ధీరులు ఎంతమాత్రమును మోహము నొందరు.

అనువాద పద్యం :-

కం.13

వాహిత బాల్యము ప్రాయము

దేహి యనుభవించి జరయు దేహము విడువన్ 

దేహాంతరమిక కలుగును 

మోహములో దీనికొరకు మునుగరు ధీరుల్ (2-13)

వాహితం...వహింపబడినది

🙏🙏🙏🙏🙏🙏🙏🙏🙏🙏🙏

శ్లోకం - 20

న జాయతే మ్రియతే వా కదాచిత్ 

నాయం భూత్వా భవితా వా న భూయః 

అజో నిత్యశ్శాశ్వతో2యం పురాణో 

న హన్యతే హన్యమానే శరీరే 

ప్రతిపదార్ధం :-

అయమ్ =ఈ ఆత్మ 

కదాచిత్ =ఎప్పుడును

న జాయతే= పుట్టుటలేదు 

నమ్రియతేవా= చచ్చుటయులేదు 

న భూత్వా= ఇదివఱకు లేకుండి 

భూయః =మరల 

భవితావాన =క్రొత్తగా కలుగువాడును కాదు

 (లేక )

(భూత్వా =ఉండి 

భూయః =మరల 

నభవితాన= లేకుండువాడు కాదు)

అయమ్ =ఇతడు 

అజః =పుట్టుక లేనివాడు 

నిత్యః =మరణము లేనివాడు 

శాశ్వతః =ఎల్లప్పుడునుండువాడు 

పురాణః =అనాదియైనవాడు 

శరీరే హన్యమానే (సతి) =శరీరము చంపబడినను 

న హన్యతే =చంపబడుటలేదు

తాత్పర్యం :-

ఈ ఆత్మ ఎప్పుడును పుట్టుట లేదు.ఇదివరకు లేకుండి మరలా క్రొత్తగా కలుగువాడు కాదు.ఈతడు జననమరణాలు లేనివాడు.శాశ్వతుడు.పురాతనుడు.శరీరము చంపబడినను ఈతడు చంపబడుట లేదు.

అనువాద పద్యం :-

కం.-20.

జననము లేనిది,పూర్వము 

కొనలిడ లేనిదియు కాదు, క్రొత్తగ మరలా 

జనియించని దాత్మ పురా 

తనమై చిరమై నిలుచును తనువు తరలినన్.

కొనలిడుట వర్ధిల్లుట 

🙏🙏🙏🙏🙏🙏🙏🙏🙏🙏

శ్లోకం - 21

వేదావినాశినం నిత్యం 

య ఏనమజమవ్యయమ్ 

కథం స పురుషః పార్థ 

కం ఘాతయతి హన్తి కమ్ 

ప్రతిపదార్థం :-

పార్థ= ఓ అర్జునా 

యః =ఎవడు 

ఏనమ్ =ఈ ఆత్మ ను 

అజమ్= పుట్టుక లేనివానిగను 

అవ్యయమ్= క్షయము లేనివానిగను 

అవినాశినమ్= నాశరహితునిగను

నిత్యమ్= నిత్యునిగను 

వేద= తెలిసికొనుచున్నాడో 

సః పురుషః =ఆ మనుజుడు 

కథం =ఎట్లు 

కమ్ =ఎవనిని 

ఘాతయతి =చంపించును?

కమ్ =ఎవనిని 

హన్తి =చంపును?

తాత్పర్యం :-

ఓ అర్జునా!ఈ ఆత్మను ఎవడు జనన మరణాలు లేనివానిగను,నాశరహితునిగను,నిత్యునిగను ఎఱుంగునో, అట్టివాడు ఎట్లు ఒకనిని చంపించగలడు? తాను చంపగలడు?

అనువాద పద్యం :-

కం.21

లేనిది పుట్టువు మరణము 

కానిది గద!నాశ మాత్మ,కలుగును నిత్యం 

బీ నిజ మెరిగిన మనుజుడు 

తానెటు చంపించు?చంపు?తలపుము పార్థా!

*తలపుము..తలపోయుము, ఆలోచన చేయుము.

🙏🙏🙏🙏🙏🙏🙏🙏🙏🙏