20/3*సుప్రభాత కాంతులు* కందంలో* *శ్రీ వేంకటేశ్వర ప్రపత్తి*(16 శ్లోకాలు)

**********************************************************

*సుప్రభాత కందం*

*స్వేచ్ఛానువాదం*

*శ్రీ వేంకటేశ ప్రపత్తిః*(16 శ్లోకాలు)

*శ్లోకం..41

ఈశానం జగతోస్య వేంకటపతే ర్విష్ణోః పరాం ప్రేయసీమ్

తద్వక్షస్థ్సల నిత్యవాసర సికాం తత్‌ క్షాంతి సంవర్థనీమ్‌|

పద్మాలంకృత పాణిపల్లవ యుగాం పద్మాసనస్థాం శ్రియం

వాత్సల్యాది గుణోజ్జ్వలాం భగవతీం వందే జగన్మాతరమ్‌|| 

*కందం..41*

లోకేశ్వరి!ప్రియమారగ

లోకేశుని హృదయసీమ లోగిలి గాగన్

చే కమలము దాల్చి సతము

శ్రీకాంతుని మురియజేయు సిరి గొను ప్రణతుల్.

తాత్పర్యం: 

ఓ లోకేశ్వరీ! చేత కమలములు ధరించి,ఆ శ్రీహరి హృదయమే నివాసంగా ప్రీతితో నివసిస్తూ,ఆ స్వామికి సదా ఆనందం కలిగించే ఓ శ్రీదేవీ! నీకు నమస్సులు.

*****************************

*శ్లోకం -42*

శ్రీమన్ కృపాజలనిధే కృతసర్వలోక

సర్వజ్ఞ శక్త నతవత్సల సర్వశేషిన్ ।

స్వామిన్ సుశీల సులభాశ్రిత పారిజాత

శ్రీవేంకటేశచరణౌ శరణం ప్రపద్యే 

*కందం - 42*

సిరి గలవాడా!కరుణకు

నిర వగువాడా!సకలము నెఱిగినవాడా!

వరదా!ఓ భక్తసులభ!

శరణంటిని నీ పదములు జగదాధారా!

తాత్పర్యం : 

ఓ శ్రీనివాసుడా!కరుణామయుడా!

సమస్తము ఎఱిగినవాడా!కోరిన వరములొసగి భక్తులను అనుగ్రహించే భక్తసులభుడా!సకల జగతికి ఆధారమైనవాడా! నీ పాదములనే నేను శరణువేడుచున్నాను.

*****************************

*శ్లోకం..43*

ఆనూపురార్పిత సుజాత సుగంధిపుష్ప

సౌరభ్యసౌరభకరౌ సమసన్నివేశౌ|

సౌమ్యౌ సదానుభవనే పి నవానుభవ్యౌ

శ్రీవేంకటేశ చరణౌ శరణం ప్రపద్యే||

*కందం..43*

చక్కని విరులకు దళముగ

దక్కెను నీ పదము లంట తావియు,శోభల్

చొక్కపునూపురచరణమె

దిక్కని మ్రొక్కెద శరణిడు దీనావనుడా!

తాత్పర్యం : 43

ఓ దీనశరణ్యా!నీ పాదములను చేరుటవల్లనే వికసించిన పుష్పాలకు సౌందర్యము,సుగంధము అబ్బుతున్నాయి.అటువంటి నీ పాదములే దిక్కని నమ్మిన నాకు శరణమిచ్చి రక్షించుము.

*****************************

*శ్లోకం..44*

సద్యోవికాసి సముదిత్త్వర సాంద్రరాగ

సౌరభ్యనిర్భర సరోరుహ సామ్యవార్తామ్ |

సమ్యక్షు సాహసపదేషు విలేఖయంతౌ

శ్రీవేంకటేశ చరణౌ శరణం ప్రపద్యే ||

*కందం..44*

నవవికసితనళినారుణ

నవకమ్ముల మించెడు తిరునాథుని పదముల్

నవకిసలయమృదులమ్ములు

భవసాగరతారకములు భక్తాళి కిలన్.

తాత్పర్యం : 44

అప్పుడే వికసించిన ఎర్రకలువల సౌందర్యాన్ని మించిన సొగసుతో విలసిల్లే ఆ శ్రీనివాసుని పదములు,

చిగురాకులంత సుతిమెత్తనివి.అవి

 తనను కొలిచే భక్తులను సంసారసాగరాన్ని దాటిస్తున్నాయి.

*****************************

*శ్లోకం..45*

రేఖామయ ధ్వజ సుధా కలశాతపత్ర,

వజ్రాంకుశాంబురుహ కల్పక శంఖ చక్రైః|

భవ్యై రలంకృత తలౌ పరతత్త్వ చిహ్నైః,

శ్రీ వేంకటేశ చరణౌ శరణం ప్రపద్యే||

*కందం..45*

చిన్నెలు శంఖము చక్రము

లున్నవి, ధ్వజమాతపత్ర ముండెను, కమల

మ్మున్నది, పీయూష కలశ

మున్నది తోత్రంపురేఖలుండె పదములన్.

తాత్పర్యం :  45

ఓ తిరుమలేశా!

మంగళకరములైన శంఖుచక్రాలు,

ధ్వజము, గొడుగు,కమలము,అమృతకలశము,అంకుశము మొదలైన శుభచిహ్నములచేత అలంకరించబడిన   నీ పాదముద్రలే నాకు శరణము.

*****************************

*శ్లోకం..46*

తామ్రోదరద్యుతి పరాజిత పద్మరాగౌ

బాహ్యైర్మహోభి రభిభూత మహేంద్రనీలౌ ।

ఉద్య న్నఖాంశుభి రుదస్త శశాంక భాసౌ

శ్రీవేంకటేశ చరణౌ శరణం ప్రపద్యే ॥

*కందం..46*

చూడగను పద్మరాగ

 మ్మోడగ, యా యింద్రనీల మోడగ,చంద్రుం

డోడ,యరుణ నీల ధవళ 

మాడె క్రమముగ నరికాళ్ళ నంఘ్రి నఖములన్.

తాత్పర్యం : 

ఓ శ్రీరమణా! నీ అరికాళ్ళు పద్మరాగమణుల ఎర్రదనాన్ని,పాదములు ఇంద్రనీలమణుల నలుపును,నఖములు చంద్రుని  ధవళకాంతిని ఓడించుచు ప్రకాశించుచున్నవి.

**********************************************************

*శ్లోకం..47*

స ప్రేమభీతి కమలాకర పల్లవాభ్యాం

  సంవాహనేపి సపది క్లమ మాధధానౌ|

  కాంతా వవాఙ్మానస గోచర సౌకుమార్యౌ

  శ్రీవేంకటేశ చరణౌ శరణం ప్రపద్యే||

*కందం..47*

కిసలయసమ హస్తమ్ముల

హసితానన యాదిలక్ష్మి యనవరతమ్మే

బిసరుహ కాంతుల పదముల

నెసగెడు యనురక్తి నొత్తు నెరగుదు వానిన్.

తాత్పర్యం : 47

మందస్మిత వదనయైన ఆ ఆదిలక్ష్మి చిగురాకులవంటి తన చేతులతో   నిత్యమూ ఏ మృదుపదములను ఎంతో ప్రేమతో ఒత్తుతుంటుందో, అటువంటి నీ పాదములకు నేను నమస్కరిస్తున్నాను.

*

*****************************

*శ్లోకం..48*

లక్ష్మీ మహీ తదనురూప నిజానుభావ

నీళాది దివ్య మహిషీ కరపల్లవానామ్ ।

ఆరుణ్య సంక్రమణతః కిల సాంద్రరాగౌ

శ్రీవేంకటేశ చరణౌ శరణం ప్రపద్యే||

*కందం..48*

శ్రీదేవియు,భూదేవియు

మోదముతో నీళసతియు మురహరి సతత

మ్మాదట సేవించు పదము

లీదగ సంసారజలధి నిదె శరణంటిన్.

తాత్పర్యం : 48

శ్రీదేవి, భూదేవి ,నీళాదేవి ఏ చరణములనైతే నిరంతరమూ సేవిస్తుంటారో,ఆ పదములనే నేను ఈ సంసార సాగరాన్ని దాటించుమని శరణు కోరుతున్నాను.

*****************************

*శ్లోకం..49*

నిత్యా నమద్విధి శివాది కిరీటకోటి

ప్రత్యుప్త దీప్త నవరత్న మహః ప్రరోహైః|

నీరాజనా విధి ముదార ముపాదధానౌ

శ్రీ వేంకటేశ చరణౌ శరణం ప్రపద్యే||

*కందం..49*

పదమంటగ బ్రహ్మాదులు

పొదిగిన నవరత్నమకుట పొత్తుక గన నీ

పదముల కెత్తిన హారతి

యది యన చెలువొందు యంఘ్రు లాత్మ గొలిచెదన్.

తాత్పర్యం : 49

ప్రతి దినమును బ్రహ్మ, మహేశ్వరుడు మొదలగు దేవతలు నమస్కరించునప్పుడు వారి కిరీటములందలి మేలి నవరత్న కాంతులచే మంగళహారతి ఇవ్వబడుతున్నట్లు వెలుగులీను నీ పాదములను నేను నా మనసులో నిలిపి సేవిస్తున్నాను.

**********************************************************

*శ్లోకం..50*

విష్ణోః పదే పరమ” ఇత్యుదిత ప్రశంసౌ

యౌ 'మధ్వఉత్స' ఇతి భోగ్యతయా ప్యుపాత్తౌ|

భూయ స్తథేతి తవ పాణితలౌ ప్రతిష్ఠౌ

శ్రీ వేంకటేశ చరణౌ శరణం ప్రపద్యే ||

*కందం..50*

పరమమ్ములు పావనములు

మరందముల యూట లనగ మన్ననగల నా

చరణములివియని చూపుచు

శరణొ సగెడి నీదు కరుణ జగముల గాచున్.

తాత్పర్యం : 50

"పరమపదమును చూపునవి,పావనమైనవి,తేనెల ఊటలు అని  కొనియాడదగినవి  అయిన నా పాదములివే.వీటిని శరణువేడు , నిన్ను కాపాడుతాను" అని  నీ పదములను చూపుతున్న నీ దయయే  లోకాలను పాలిస్తున్నది.

*****************************

*శ్లోకం..51*

పార్థాయ తత్-సదృశ సారధినా త్వయైవ

యౌ దర్శితౌ స్వచరణౌ శరణం వ్రజేతి ।

భూయోపి మహ్య మిహ తౌ కరదర్శితౌ తే

శ్రీవేంకటేశ చరణౌ శరణం ప్రపద్యే||

*కందం..51*

నిర్జింపను బంధులనని 

వర్జింపగ నాయుధమును, వలదని మోహ

మ్మర్జునునకు శరణొసగుచు

కర్జము జరిపించినట్టి కంసారి నమో!

తాత్పర్యం : 51

ఓ కంసారీ!న బంధువధ చేయలేనంటూ ఆయుధములను విడిచి ,దుఃఖిస్తున్న అర్జునుని మోహం తొలగించి,కార్యోన్ముఖుని చేసి యుద్ధం జరిపించి, ధర్మరక్షణ చేసిన నీ పాదములను నేను శరణు కోరుతున్నాను.

*****************************

*శ్లోకం..52*

మన్మూర్థ్ని కాళియఫణే వికటాటవీషు

శ్రీవేంకటాద్రి శిఖరే శిరసి శ్రుతీనామ్ |

చిత్తేప్యనన్య మనసాం సమమాహితౌ తే

శ్రీవేంకటేశ చరణౌ శరణం ప్రపద్యే||

కందం..52

అల కాళీయుని పడగల

వెలసియు గరుడాద్రి శిఖరి,వేదోపనిష

త్తుల చెలువొందెడు పదములు

నిలిపెద నా హృదయ సీమ నిత్యము శ్రీశా!

తాత్పర్యం :51

ఓ శ్రీనివాసా! కాళీయుని పడగల పైనా, గరుడాద్రిశిఖరము పైనా,వేదోపనిషత్తులయందును అందగించే నీ పాదములను నిత్యమూ నా హృదయసీమ లో నిలిపి సేవిస్తాను.

*****************************

శ్లోకం..53

అమ్లాన హృష్య దవనీతల కీర్ణపుష్పౌ

శ్రీవేంకటాద్రి శిఖరాభరణాయ-మానౌ ।

ఆనన్దితాఖిల మనో నయనౌ తవై తౌ

శ్రీవేంకటేశ  చరణౌ శరణం ప్రపద్యే||

*కందం..53*

విరులకు సౌరభ మద్దుచు,

నరుల మనమ్ములకును,నయనములకు దీపాం

కురమై,వరమై తిరుమల

గిరికిని,వెలిగెడు పదముల కేశవ! కొలుతున్.

తాత్పర్యం : 53

పుష్పాలకు సుగంధాన్ని అద్దుతూ,మానవుల నయనాలకు,హృదయాలకు వెలుగునిచ్చే దీపమై , తిరుమలకొండకు వరమై  నిలిచిన నీ పాదములను నేను సేవిస్తాను.

*****************************

*శ్లోకం..54*

ప్రాయః ప్రపన్న జనతా ప్రథమావగాహ్యౌ

మాతుః స్తనావివ శిశో రమృతాయమానౌ ।

ప్రాప్తౌ పరస్పర తులా మతులాన్తరౌ తే

శ్రీవేంకటేశ చరణౌ శరణం ప్రపద్యే||

*కందం..54*

పాపలకును చనుబాలెటు

మాపియు ఆకలి అమృతసమమ్మగు నటులే

పాపులకును నీ చరణము

చూపును సద్గతి యని తొలి జోతల నిడెదన్.

తాత్పర్యం..54

పాపలకు తల్లిపాలు ఏ విధంగా ఆకలిని తీర్చి,అమృతంలా  ఆయువును పోస్తాయో, అదే విధంగా పాపాత్ములకు సద్గతులను చూపేవి నీ చరణాలే అంటూ వాటికి తొలి వందనము చేస్తున్నాను.

*****************************

*శ్లోకం..55*

సత్త్వోత్తరైః సతత సేవ్యపదాంబుజేన

సంసార తారక దయార్ద్ర దృగంచలేన ।

సౌమ్యౌ పయంతృ మునినా మమ దర్శితౌ తే

శ్రీవేంకటేశ చరణౌ శరణం ప్రపద్యే||

*కందం..55*

సుజనులు కొలిచెడి పాదము

భజియించిన దాట వచ్చు భవసాగరమున్

భుజగశయన!నీ పద పం

కజ ముడుపు తపోధనులకు కర్మము లెల్లన్.

తాత్పర్యం : 55

ఓ పన్నగశయనా! పుణ్యాత్ములు కొలిచే నీ పాదాలను సేవించినచో ఈ సంసార సాగరాన్ని సులభంగా దాటవచ్చును.పావనమైన నీ పాదపద్మములు తపోధనుల కర్మబంధాలను తొలగించివేస్తాయి.

*****************************

*శ్లోకం..56*

శ్రీశ శ్రియా ఘటికయా త్వదుపాయ భావే

ప్రాప్యేత్వయి స్వయముపేయ తయా స్ఫురంత్యా |

నిత్యాశ్రితాయ నిరవద్య గుణాయ తుభ్యం

స్యాం కింకరో వృషగిరీశ న జాతు మహ్యమ్ ||

*కందం..56*

భక్తియు జ్ఞానము గల్గిన

భక్తులకును మోక్షమిడెడు వైకుంఠవిభూ!

ముక్తునిగా నను జేయు మ

శక్తుడ శరణమ్ము నీదు చరణ మనియెదన్.

తాత్పర్యం : 56

ఓ వైకుంఠవాసా! భక్తి, జ్ఞానము గల్గిన భక్తులకు  మోక్షమునిచ్చే నీ చరణములే శరణమని వేడుకుంటున్నాను. ఈ భవబంధములనుండి బయటపడలేని అశక్తుడనైన నాకు అభయమును ప్రసాదించుము.

****************************

*కందం..56A*

ఏ పాదము బ్రహ్మ కడిగె

నే పాదమునందు గంగ యేరైన దహో!  

ఏ పాదము బలి నడచిన

దా పాదము నాకు దిక్కు హరి పాదమదే!

తాత్పర్యం.. 56A

బ్రహ్మ చేత కడగబడినది,గంగ ప్రభవించిన పవిత్ర స్థలమైనది,బలిని పాతాళానికి అణచివేసినది అయిన ఆ శ్రీహరి పాదమే నాకు దిక్కు.

*కందం..56B*

నీ పదమే ధ్యానింతును

నీ పదమే నమ్మి నాదు నిధి యనుకొందున్

నీ పదమే సేవింతును

నీ పదమే పరమపదము నీరజనాభా!

తాత్పర్యం.56B

ఓ నీరజనాభా! నీ పదమునే నేను ధ్యానిస్తాను.నీ పదమునే నమ్మి సేవించి,అదే నా భాగ్యం అనుకుంటాను.పరమపదమును చేర్చగలిగే పాదము నీదే స్వామీ! 

**********************************************************